سياسة كتم و أدفن...البقاء لله كلنا لها

أنا نفسي أفهم الكائنات الحية دي بتفكر إزاي ...أنا أعرف أن الدول بتكتم على أنباء الإضرابات الإنقلابات ...لكن واضح أنه سياسة ..كتم و أدفن هي سياسة الإعلام الحكومي اللي مقضيها أوردرز جاية من فوووووق فوووق أوي ...الناس كلها عرفت نبأ وفاة محمد علاء مبارك ..كوكب الأرض كله عرف خلاص ..و دول لسه بيزيعوا البرامج عادي جداً ..الجزيرة حتته و بي بي سي و مواقع من الجزائر حتى نشرت الخبر ...و دول نايمين في العسل ...هما فاكرين نفسهم فين ولا إمتى ؟!! باينلهم عايشين في زمن الراديو ولا إيه ...السيد يقول و الشعب يأمن !!الراديو يقول :أسقطنا 20 طيارة ..أسقطنا ميت طيارة ..والناس تقعد تسقف و ترقص في الميادين مع كامل أسفكم على دي أيام الزمن الجميل لما كنته بتعرفوا تاكلوا بعقل الناس حلاوة اللي و عارفه أن زعلكوا ده حيفوق الأسف على وفاة طفل عنده 13 سنة .....أنتوا شايفين الشباب الجاهل ده ؟!!الإنترنت ياما بيعلم ..شايف التويتر و بلوجر دول يا ما بيلموا..و جوجل ده يدورلك على أي معلومة (و قريباً حستخدمه يدورلي على الشربات المترمية في الأودة) ما علينا نتيجة أن إخوانا البعده مكتمين على الخبر فإحنا قدامنا واحد من تلت سينريوهات

الأول: أنه مات بمرض في المخ (حتقولي المرض إيه حقلك معرفش) نقل على أثره إلى مستشفى "وادي النيل" في القاهرة، ثم نقل بعد ذلك إلى مستشفى فرنسي، حيث أستدعي جراح عالمي ..لكن روحه فاضت إلى بارئها
اللـــــــــــــــــــه أعلــــــــــــــــــــــــــــــــــم

الثاني : أنه اصابه حالة تسمم شديدة نتيجة وجبة فاسدة اكلها بره البيت (يا ريت أشوف بيتهم والنبي )و الأمر استدعى نقله إلى فرنسا للعلاج
مع كامل إعترافي أني معرفش البطيخ من كوز الدرة في الطب...و معلوماتي عن الطب هي معلومات عم حسن البواب عن الأرتكارية ..لكن هل حالات التسمم تستدعي العلاج في الخارج..يعني يا ريت اللي بيفهم في الطب يقولي


الثالث: أنه توفى نتيجة حادث جت سكي (يقال أنه كان في شرم الشيخ)

لزوم الألاطة يعني ولا إيه ؟؟ مش عارفه أهي أقاويل..
أنا عارفة كده أن عيشتكوا مع جرايد ما تحت بير السلم ...لكن طول ما إخواننا البعده مكتمين و عاملين ودن من طين و وعشرين من عجبن حتفضل دي إشاعات
وبجد عمري ما تخيلت أني حتعاطف مع العيلة دي أبدا لكن ربنا قال " ولاتزر وازرة وزر أخرى" ..بمعنى أن كل شخص مسؤل عن أعماله ..يعني هذا ما جنته يدا أبي ..مش يدي أنا!! في ناس ممكن تقلك ما هو بقالوا م28 سنة مبهدل ولادنا و مموت شبابنا ..30 سنة ظلم ...صح لكن في النهاية ده طفل مكملش 14 سنة مخترش حاجة لسه ...مش مسؤول عن أهله و عمايلهم ...ربنا يصبر أمه و كل أم مكلومة

*************************************************************************************
أنتطرونا في النشرة القادمة لنوافيكوا...بالأخبار على رأس كل 36 ساعة ( لأني بصراحة مش فاضية أوافيكوا كل نص ساعة زي الجزيرة) و في إجندة ال36 القادمة
اللطم و الشرشرة في الصحافة المصرية و صوتي يا ولية

كان معكم من أمام الكيبورد
واحدة محبوسة و مفروسة
إسراء السقا