Wednesday 25 November 2009

الرجاء الحذر البوست فيه؟؟

بالصلاة على النبي ...متستناش مني لا فصحى و لا نحوي ولا عامية مصرية صحيحة و لا رأي سديد حتى ، حكتب زي مالكيبورد يطلع فجايز يطلعلك كلمتين كويسين و جايز يطلع بكابورت عليك ..أصل في كلام كتبر بقاله محشور في حلقومي من كام أسبوع ( لاحظ مش من أسبوع زي بقيت الناس أنحشرت كل حاجة عندهم عقب أنتهاء المسلسل الدراماتيكي بموقعة أم درمان ) ..نصيحة لوجه الله تعالى و يشهد ربنا لو رأيك\رأيِك ( لاحظ الكسرة في رأيك التانية ) هو من رأي الإعلام السائد أو شرشحة الإعلام ..فنصيحة لا تقرأ هذا البوست ..البوست فيه تبكيتٌ مقيت !!. و أعتقد أنك متوتر و زهقان و طهقان و قرفان و إلا مكنش رماك مصيرك عندي !!.فيا عيني عليك ( عليكي ) حمالين أسية و الله بقالنا مستحملين أسبوع من الصراخ و العويل و الرجالة اللي طالعة عالهوا تلطم و العياط أون إير من الإعلاميين المتزلفين ...و النبي يا شيخ\ة ما أنتوا قاريين !!...أصلي نخبوية ( أو على الأقل أتهمت بالموضوع ده معرفش يعني إيه نخبوية الصراحة اصلي مش عباس العقاد طالع ينظر عليهم يعني !!) .....لو مصر أنك تقرا ..فلا تلومن إلا نفسك قلتلك ممكن الكلام ميعجبكش و جايز أطلع عميلة ، خنزيرة ...حسب الشتيمة اللي حتقررها أو مش حتقررها سيادتك (دي تنفع مؤنث و مذكر) ..

الشقيقة الكبرى مبقتش كبرى دي بقت في حكم مرات الأب – الله ما يوعدكم بمرات الأب – يعني شرشحة تلاقي ..كدب تلاقي ...عوم على عوم الحكومة تلاقي ...دايمن كنت بحس إننا المصريين غلابة ...يعني شعب شبه ميت أو في حالة غيبوبة بسبب الديكتاتورية و القمع فبقبنا منكفئين أوي على لقمة عيشنا و قوت يومنا و ده منانا و أقصى أحلامنا ..بس اليومين اللي فاتو دول كشفلي صبيانية رأيي ده ..و أني طلعت عيلة !!!..لأننا فايقين بس بمزاجنا ..يعني في القضية اللي بتعجبنا ( ماتش كورة مثلاً يتحرق قلبنا دعاوي لكن آلافات يوموتوا في قطارات ، طيارات بتمرق عادي على رأي اللبنانيين ..كأن لم تكن ..ممكن برده نسيب كارثة العبارة و نروح نرقص في الماتش ..كل ده كان بيحسسني أني قدام خمارجية ..مخمورين بالمجد الكروي ..


لكن جات المظاهرات قدام السفارة الجزائرية بالقاهرة اللي اتقدر عدد اللي اشتركوا فيها بالآلاف عشان تعرفني لا ده أحنا فايقين اوي ..و بنخطط و نتكتك و نظم أو حتى بنعرف نلم بعض و أسم الله علينا بنعرف نضرب الأمن و نجرح ظباط ( لووووولووولووووولي ) و عساكر ..و نكسر عربيات و نحاول نقتحم السفارة ( اللي للأسف مكنتش في العمارة ) !!!.إيه ده ده أحنا فايقين آه و ننزل آه و بنواجه آه و بنتظاهر و شبابنا ممكن يروحوا يوجهوا الأمن ( و ده بيضع الشاب منهم في إحتمالية كبيرة أنه يروح ورا الشمس ) ..عنتر مين ده اللي بيلعب بالجزائر ده إحنا عندنا عنتر و زعتر و فلفل كمان ...فخلاص يا شعب مصر حقك عليه مش حعاملك كطفل تاني أبتاً أبتاً و خلاص حعاملك كبالغ راشد عاقل ( يعني زي الحكم الشرعي شخص مسئول تماما عن تصرفاته)...فمبروك و صولك لسن الرشد في نظري ))

طبعاً ياريت الناس عندنا بتتظاهر ...( و ده مش تحريض خالص ضد قانون الطوارىء مدد الله في تمديده كمان و كمان) بس ده مش شيء سلبي ...لا و كمان الشرطة سمحت بالمظاهرات ..أصلهم بيوراعو مشاعرنا أووووي ( حونييينييين من يومهم سودة و قوية و كلها حنية ) ..لكن في رأيي المتواضع و لتعذر ابنتك العيلة الآبقة ، فأنت ماشاء الله راشد و أنا لسه مدخلتش في سن الرشد ...في رأيي التظاهرات دي ضلت طريقها مش حقولك لسفارة إسرائيل زي ما بعض العروبيين بيقولوا لكن ضلت طريقها فين !!!!! فوق الكوبري ( و الحدق يفهم يعني ) ..يعني يا شعب مصر اللي مش غلبان و مش في غيبوبة و مش مخدر و لا مخمور ..شوبابك مش لاقين ياكلوا مش لاقين يشتغلوا مش لاقيين يتجوزوا مش لاقيين يسكونوا مش عارفين يتعلموا ..و قريبا مش حيلاقو تمن تحليل أنفلونزا الخنازير ...يا شعب مصر أولادك مقهورين و أعفن أمين في دي البلد ممكن يعكشك يشتمك و يشدك من قفاك أنت و نصيبك عالبوكس ، التخشيبة ، التلاجة ، القبر ( كله قضاء و قدر يا شعب مصر ) ..بقالك من زمااااان أعتقد مبقتش تعد كاتمين على نفسك ، و بيخدوا قوتك ..و أنت يا شعب مصر الراشد سايبهم يرتعوا و يلعبوا كأنها سويقة اللي جبوها ..


يا شعب مصر دمروا تاريخك بسياستهم و أساؤا لكفاحك بقرارتهم ..و مرمغوا نضالك بالتراب و بقيت في نظر العالم ..حليف ، وإسرائيل و لزرقة عيون نجمة داوود قافل المعبر و مانع ناس من أنهم يسافروا يهاجروا ..ينتحروا هما حرين أديك مناعهم و خلاص ..ممكن يقول قائل : فلسطين إيه ..طب و أنا مالي ..طيب يا شعب مصر الراشد بلاش فلسطين خااااالص ..تعرف بريز ؟؟ سمعت الأسم ده ...أيون ده كان عندنا في مصر اليومين دول ..تعرف مين الراجل ده ؟؟؟ ده مجرم حرب ...و ليه سجل أسود و مهبب بلون الدم و القنابل اللي حرقت شعوب ...آخرها كان غزة ..يوووووه معلش نسيت مش حجيب سيرة فلسطين أكسيكيوز مي ..تسمع عن عملية سوزانا ؟؟ أستهداف المصالح الأمريكية و البريطانية في مصر ؟؟ ..طب ممكن متكنش سمعت و لا قريت عنها ..طب اتفرجت على رأفت الهجان ؟؟ أول حلقات في يهودية مصرية أسمها مارسيل امها غلبت معاها تقنعها أن مصر دي وطنهم و البت كانت أبداً إسرائيل هي الوطن , كانت مارسيل بتحب جون دارلينج العميل اليهودي و اللي لم يهود حواليه عشان يوقعوا مصر في إنجلترا و أمريكا و كان طريقهم لده الإغتيالات و الحرايق و التفجيرات !! مطولش عليكوا ..في الآخر أتقفشوا لأن فيليب نتاسون فرقعت القنبلة اللي في جيبه قبل أوانها و هو قدام سينما ريو بالإسكندرية ....فاكرين ؟؟ شوفتوا بقى انا متابعة المسلسلات إزاي ..المهم انه في القصة الحقيقية المتورطين كانو: جون دارلينج ، مارسيل نينو ، فليب نتاسون، نئيل يوحاس، نئيل زعفران، فيكتور كوهين ،ايلي كوهين و صامويل عزار كان بينهم عدد من أكبر زعامات اليهود ( معلش اصبروا عليه حتفهموا دلوقتي ) و ده الأهم هما الزعماء : موشي شاريت ، بنحاس لافون، دافيد بنجورين، شمعون بريسكي .....مين شمعون بريسكي ده ؟؟؟؟

ده شمعون بريس قبل ما يتعبرن أسمه ..يعني اللي جه زار بلد سيادتك ده واحد مارس الإرهاب ضد بلد سيادتك ..و دي أبسط جريمة في سجله الحافل ( على فكرة حائز على جائزة نوبل ) ..طب ده التعذيب لا يسقط بالتقادم ..أمال الإرهاب إيه ؟؟ ؟.. بلاش بيريز يا شعبنا الراشد ..تسمع عن غابي إشكينازي ؟؟؟ ممكن تكون سمعت أسمه في الحرب على غزة أو حرب تموز 2006 ...حضرته برده جه مصر كذا مرة ,, و جاء أهلاً و نزل سهلاً ..على مسئولينا ..مين غابي إشكينازي اللي صدعت أسمك بيه ده ؟؟ ده مسؤول عن مذابح ضد الأسرى المصريين ( لو أعتبرنا أن قتل كل إنسان ظلما دي مجزرة و جريمة ضد الإنسان ) ..!! أيون و محكوم عليه غيابيا في مصر ...بتهمة قتل الأسرى سنة 1967 ..أي نعم ..يعني مطلوب في جريمة حرب !!! .. الله ينور عليك مجرم حرب و زار بلدنا نقفل بابنا في وشه يعني ؟؟...بما أنك يا شعب مصر غضنفر و بتتظاهر و بتغضب و نوء نوء مش في غيبوبة زي ما كنت فاكرة ..إيه رأيك سيادتك بعد إذن ساعدتك تنزل تتظاهر برده ؟؟ أصل خلي بالك مع كامل إحترامي للمشجعين اللي راحوا السودان ..دول أغلى عندي ..آه قريت صح الأسرى المصريين دول أغلى ..لأنهم دافعوا عن كرامتي و كرامتك و لولاهم مكنتش حبقى موجودة و ممكن حضرتك مكنتش تبقى موجود دفعوا عن مجدنا و كرامتنا مش برجليهم ( زي لعيبة الكورة ) لكن بدمهم و روحهم ...لا مؤاخذة هو فيه أغلى على البني آدم مننا غير روحه !!! دول اللي رفعوا علمنا قبلها و صمدوا و أتذلوا وأتهانوا و أنا واثقة ان مشاعرك ناحيتهم هي نفس مشاعري نحيتهم دي أكيدة ...لكن أعذرني أني مش عاجبني أن حضرتك تظاهرت عشان مشجعين اتكسر باصهم و اترمى عليهم طوب و سكاكين و اتهددوا و اتروعوا و اتقطع عليهم الطريق للمطار ...و في نفس الوقت مش بتعمل شيء عشان الأسرى اللي أتهانوا في عتليت و اتشحنوا في قطارات البهايم و البضايع ,,و أترمى عليهم علب الأكل ( مكنش فيه أيامهم كانز يمكن ) .. لم تكرمهم و طواهم النسيان ..و احتفيت بلعيبة الكورة !! قال إيه عشان خلونا نرفع علم مصر ؟؟؟ قال إيه عشان خلوا 80 مليون مصري يرفعوا أديهم و يقولوا يا رب متقولش التمانين مليون دول كانوا ملحديين و هداهم المنتخب للطريق الحق !!!. رجائاً يا شعب مصر الراشد ..حط الأسرى دول و الأبطال الحقيقين على جدول تظاهراتك و غضبتك للكرامة المهدرة !!.


بلاش عسكر ..جايز تكون شايف العسكر سر نكبتنا و بلآنا إيه رأيك في عسكر سابقين ؟؟ سمعت عن جمال حمدان ..قبل كده ؟؟ ده راجل مثقف و وكان واحد من الضباط الأحرار اللي قاموا بثورة يوليو ( اللي مش بعتبرها ثورة ولا يحزنون هي إنقلاب عسكري و للأسف لم يحقق أهدافه المعلنة و الله اعلم بأهدافه السرية ) ..الراجل ده أرخ لتاريخ مصر و عمل مؤلفات كتير ..و أنتقض ثورة يوليو حتى و درسها ..و هو عظيم أختلف بقى أتفق بقى هو رجل عظيم , و مهذب و رقيق ...جمال حمدان توفى ؟؟؟ حضرتك سمعت عنه ؟؟؟ بلاش جمال حمدان ....تعرف عبد الوهاب المسيري ؟؟ واحد من أبرز من درس الصهيونية و ليه دراسات فلسفية و ترجم قصيدة الملاح للعربية و حتى كتب للأطفال ( قريتله أغنيات إلى الأشياء الجميلة حاجة بديعة بصراحة ) تقدر تقول عليه أديب رفيع ، فيلسوف رقيق ، إنسان مهذب ، و مصري خفيف الظل !! عبد الوهاب المسيري صارع السرطان طويلا و طواه السرطان قبل أن يطوي آخر مؤلفاته ..حضرتك شفتله جنازة على التلفزيون ..بلاش المسيري ..تعرف مصطفى محمود أهو ده أقرب واحد عكس ناس كتيرة أنا معرفش مصطفى محمود من برنامجه العلم و الإيمان لظروف ليها علاقة بأني من مواليد التسعينات و مكنتش عايشة في مصر ..لكن عرفته من كتبه و مؤلفاته زي رأيت الله ، الروح و الجسد ، حوار مع صديقى الملحد ، لغز الموت ، الروح و الجسد ، في الحب و الحياة ، نحو علم نفس قرآني.. ليه 90 مؤلف دول اللي قريتهم تقريباً ..مصطفى محمود مات من فترة قريبة ..حضرتك شفت مسئول واحد في جنازته , هما عرضوا جنازته أصلا ..الدولة معلجتهوش على نفقتها طب لما مصطفى محمود ميتعجلكش مين اللي يتعالج ؟؟؟ في حين أنهم فرضوا علينا الحداد إجباريا 3 أيام عشان طفل ( الله يرحمه يا رب و يرحم كل الأموات ) توفى و كان جل اللي عمله للوطن ( و مش متوقع من واحد عنده 13 سنة أي شيء) أن جدو هو الرئيس !!! ..و أتعملتو جنازة و تشريفة ..و لا جنازة البطل أحمد عبد العزيز !!. و المثقفين الحقيقين ماتوا , و معلجهومش حتى على نفقة الدولة ..أستخسروها فيهم !!!! فياريت يا شعب مصر الراشد تحط مثقفيك لما يعجزوا و يأكل الوهن و التعب و المرض أجسادهم ...لو سمحت حطهم جوه لستة أهتمامتك ..


أنت عارف يا شعبنا الراشد ...العبدة لله مستنية إنتخابات الأهلي القادمة على أحر من الجمر ..ككائن حي ينتمي لأسرة أهلاوية متعصبة كمان ..و إن كان الحمد لله يا رب لا بحب التعصب و لا بحب الكورة و لا بتابعها و بعتبر الطايرة مثلا مفضلة ليه ..مستنية الإنتخابات ليه ...عشان بتذهب إليها الجماهير الغفيرة من غير ما تمنعها قوى الأمن ..و من غير لجان بتتقفل ..يعني أمارس حق التوصيت ..لا تحقد علي لو سمحت ..في إنتخابات نقابات ، و في الجامعات ..بس أبقى قابلوني لو عرفت تصوت فيها ..و طبعا مع تمام نسيان إنتخابات الشورى و الشعب و الجمهورية ..عادي ولا تزعل حالك ممكن كل حارة تعمل إنتخابات نزيهة شفافة و كل قهوة كمان ...و ننشىء تجربة شعبية ديمقراطية ..


يعني يا شعب مصر الراشد ...يا ريت تكبر لستة أهتمامتك ..هو الصراحة أنا لازم أنهي دلوقتي لأني مش قاعدة في بيتنا ...كان نفسي اطول بس مش نافع ..حكم القعود على كافيه بقى و شرا كروت النت اللي عاملة زي كروت الشحن هووو بتخلص بسرعة ...حضرتك ممكن تتسائل عن كل الكسرات اللي حطتها في كلامي المذكور أعلاه ..العبدة لله لاحظت أن في خضم الحرب مع الجزائر ..كان كل المتعصبين من كلا الطرفين ( و دي الكلمة المؤدبة لوصفهم) كان بيشتم الطرف الآخر بستاته ..ببناته ,,, مشفتش راجل اتشتم و اتهان ؟؟ كله ستات إشي هزي يا خضرة و يا سودة ويا فيفي عبده .. و ده يعيب في ستات ده و صدعوني فقررت بإذن الله أبقى فمنيست و من هنا و رايح حضيف الكسرة ..... اللي عايز يشتم ولده يشتمه هو ..ميشتمناش إحنا !!!! و لا صعبة دي

....يا رب مضطرش أكتب في الموضوع الأسود ده تاني و إن كنت ممكن مقدرش أقاوم

أتمنى لكم ( لكن ) موفور الصحة و الهناء بعيداً عن الضغط و السكر و نوبات العلع ...و الشحنات الإعلامية و الحملات الفضائية و الغزوات الكروية


ملحوظة هامة مهمة :

لو كنت مش متفق معايا في رأيي و جايز أستفزك ..حقولك ده حقك و أنت حر فيه ..و جايز تفتكر بكلامي أني بتهمك أنك مع النظام مثلا ( اصلي شفت ناس كده و الله ) و ده مش صحيح ...هذه نقرة و تلك نقرة و إن كانت الهليلة دي كلها ... عملت للنظام دعاية مكنش يحلم بيها و لا تقولي مؤتمر قطري و لا مؤتمر ..معرفش إيه .

14 من حقك تقول لكن مش من حقك تجور:

Unknown said...

حنتظر الخلاصة
انت بتعملى فينا ليه كدة
انا زعلتك فى حاجة
ده انا حتى بحاول مرغيش فى بوستاتى
:-(

Israa El-sakka said...

ههههههه و أنا كمان بحاول بس مش قادرة مش قادرة مش قادرة بقالي اسبوع مستحملاهم ..بعبلهم بهبلهم بطهقهم لازم أطلعوا على حد ..أمت لاقيتكو ..صحيح أنت عندك أكونت على تويتر ؟؟


حقلك حاجة خدلك كلمتين من كل عشر سطور :) معلش أصير عليه و أقرالك سطرين تلاتة ..ده أنا صوابعي تعبتني في كتابته يا ابني

بدراوى said...

انا بدراوى

لأ معنديش اكونت على التويتر و مش ناوى خالص
ما هو المشكلة انك حتى مش مقسماه فقرات
سلامة صوابعك
بس عينيا يا عالم برده
هههههههه
ده انا حتى فى مدونتى حريص جداً اريح الزبون
و عامل كل شىء ليكوا
اديه جازاتى
:-(

Anonymous said...

هذه أول زيارة لي إلى هنا

لكنها زيارة سعيدة لي
وماشاء الله كاتبة مصايب، تدل على وعي جيد وانفعال شديد

بس اسمحي لي بالسؤال..
يعني ايه حق التصويت؟؟؟

انجليزي دي؟

تحياتي

م/ الحسيني لزومي said...

كل عام انتم بخير
تقبل الله منا ومنكم صالح الاعمال

Anonymous said...

عندك حق

اتفق معاكي في معظم كلامك .... الا ان الثوره كانت انقلاب عسكري

هي موش حققت كل اهدافها .... بس ليها اهداف كتير اتحققت

شيمون بيريز مجرم حرب عيب اوي نستقبله عندنا

وشتيمه الستات برضو عيب كبير اوي

كل سنه وانتي طيبه وبالف خير وسلامه

أحمد حمودة said...

الصراحة أعجبني ما تم إثارته في هذه التدوينة .. وهو توجيه الغضب في مكانه الصحيح. وبوجه عام انا صامت على ما يحدث ولم ولن أكتب عنه و الأسباب كثيرة وهي الغضب . الغضب الذي يصيبني كلما حاولت الكتابة أو حتى التحدث في الموضوع مع الأصدقاء . حاولت أكثر من مرة ولكني كل مرة أقطع الورقة اللي بكتب فيها وساعات وصلت بى الدرجة إني حرقت الورقة مش قطعتها بس ومع أني معتقد بأن ما حُرق هو أفضل ما كُتب !! إلا إني آثرت الصمت.. خلينا ساكتين أحسن!
لكن ما ميز هذه التدوينة عن غيرها هو إنك قد قمت بتوجيهنا إلى نقاط الغضب الصحيحة. أه !! مين قال إننا منعرفش نعمل حاجة ﻻ إحنا نقدر ونقدر نعمل كتير كمان. لكن لو أدركنا حقيقة أن النمل يقدر يتفوق على الجراد لو أدرك حقيقة التفوق العددي و فائدة الترابط بين هذه الأعداد..
لكن لا أتفق بأن هذا الموضوع لا يستحق الغضب فعند تورط الحكومة الجزائرية في الموضوع تحول من "خناقة على ماتش كورة" لعدم إحترام سياسي و بما إن حكومة الجزائر .. مش هقول بقى مكلفتش نفسها و قدمت إعتذار. لا!! حكومة الجزائر لم تكلف نفسها بالظهور علناً و التناقش فيما حدث حتى الآن لذا أنا لا أحترم من لا يحترمني و يتوجب على الغضب و الثورة. أه هبص للموضوع الصحيحة اللي يتوجب على إني أثور فيها لكن الأزمة الحالية هى أيضاً توجب علينا الغضب و الثورة.

وعذراً على الإطالة :$

romansy said...

كل عام والمسلمين فى مصر والعالم الاسلامى بكل خير ومحبة وسلام لكل الانام

عيد اضحى سعيد

اعاده الله على الجميع بالامن والاستقرار

والسرور والتسامح

الميكروباص said...

تهانينا بعيد الأضحى المبارك
وكل عام وأنتم بخير

micheal said...

ممكن أقول كل سنة وأنتي طيبة وأتمنالك عيد سعيد
الموضوع بقى بتاع الماتش اللي عمل كالو في نافوخ شعبين
ملخصه أننا أمام نظامين فاسدين إستغلا مباراة كرة لإلهاء شعبين عن طريق إعلام موجه
تحياتي

قويدر أوهيب said...

السلام عليكم.
كل عام و أنتم بخير.
تقبل الله منا و منكم، غفر الله لنا و لكم.
تحياتي و احتراماتي

صوت من مصر said...

عيد سعيد
مليش دعوه انا بكلامك

micheal said...

aloooooooo
:D

Ramy Wasel said...

دخلت اطمن عليكم بعد غياب طويل
وجدك ايضا يا اسراء متغيبه
ندعوا الله ان تكونى بخير
ويكون المانع خيرا
طمنينا عليكى
يا رب تكونى بخير

Post a Comment

جبلكوا كوباية شاي في الخمسينة كده عشان تركزوا
مش حنبقى محابيس و مساطيل

و ما ينطق من قول إلا لديه رقيب عتيد

دي قيم ربانية يا ريت نحافظ عليها