Monday, 16 November 2009

الكورة المنفوخة


أولا أنا عايزة أعلن و أدعو ( 2 *1) كل المصريين و الجزائريين و قارئي العربية أنهم يقاطعوا الآتي:

الشروق الجزائرية ( الشهيرة بشعللها شعللها)
اليوم السابع المصرية ( اللي عمالة تتنقل من فضيحة لفضيحة )
الخبر الجزائرية
القاهرة اليوم (عمرو اديب/ احمد موسى) - اوربيت
ومودرن سبورت - مدحت شلبي ( و فريق إعلامي مقهي العجزة)

لدورهم في إشعال ( و لا أقول خلق) و إستثارة المصريين و الجزائريين و نقلهم لأخبار غير صحيحة و عدم إلتزامهم بالمهنية و الشرف الصحفي ، الذي يحتم الحيادية و الدقة في النقل ..لكن كل الشراذم الإعلامية المذكورة أعلاه ...حاولت تحقيق نسبة متابعة أعلى و مبيعات و إعلانات و خلافه على حساب جماهير الشعبين ...دون أن يعبئوا بما سيحدثه هذا من نتائج خطيرة.

و ياريت اللي يعرف جهات إعلامية تانية تستحق المقاطعة يقول عشان نضيفهم .

س: الأحداث الأخيرة من غزوات الباصات .بماذا تلهم ؟
ج: تلهمني بفكرة مسلسل جديد : من الذي قذف الباص بالطوبة ؟؟ و الذي أقترح أن يتم إنتاجه بمشاركة مصرية -جزائرية و أقترح أن يكون طويلا على غرارالمسلسلات التركية ، و من الممكن الإستعانة بمعبود الجماهير - بتاع اليومين دول- كيفانج تاتلتوج ( مهند) و هو ما سيوحد نساء الشعبيين و النساء نصف المجتمع..و يولع النصف الباقي.


س: ما هو الأفيه المناسب عن الشغب و أعمال العنف و التراشق بالكلام و عبر الصحف قبل و بعد مبارة مصر-الجزائر الأخيرة ؟
ج: يا شمــــــاتة أبلة ظاظا فيه ..
ظاظا:مجاز مرسل يعود على العمة و نجمة داوود و حلم من الفرات للنيل.


س: كيف كان شعورك في الأيام السابقة للمبارة المطهرة؟
ج:بصراحة غزت القشعريرة بدني المتهالك ..من فرط السعادة بكمية الأعلام الموجودة في الشوارع ، الأزقة و السيارات و أعداد الأصدقاء الفيسبوكيين الذين أستبدلوا صورهم الشخصية بعلم الوطن ...و كذلك الجزائريين و الصحف الجزائرية التي كان للعلم الجزائري مكان بارز على صفحاتها على غير العادة. ..ما أصل الوطنية عندهم بتيجي على مباريات الكرة


س: من المستفيد الأول من إشتعال الأوضاع بين جمهور البلدين؟
ج: سيادتهم في مصر و الجزائر ، فقد طوقت أنتفاضة الفقراء في الجزائر ( و هي مطوقة في مصر أصلا) و خلي الشعب يتلهي في ماتشات الكورة ..وعلى رأي الحاج ماركس : الكورة أفيون الشعوب.

س: إيه سر العنف ده كله ؟؟
ج: اللي مش قادر على الحمار يتشطر على البردعة ..رجاءاً لا تسيئوا فهمي فليبحث كلاً منا عن حماره اللي مش قادر عليه


س:هل تعتقدي أن وصول أياً من مصر و الجزائر لتصفيات كأس العالم 2010 في جنوب أفريقيا سيحسن من وضع البلاد و العباد؟؟
مصر وصلت كأس العالم سنة 1990 و الجزائرشاركت في كأس العالم 1986 فهل تحسنت الأوضاع في مصر أو الجزائر في الثمانينات و التسعينات إن لم تسوء؟


- الكرة نفخوها حتى انفجرت وكانت شظياها دم و كراهية !! هل يعقل أن شعبين مناضليين يضعوا مجدهم في أرجل 22 لاعب في الملبعب ؟؟!! مش في الرؤوس لكن في الأرجل

ياريت نقاطع إعلامي المقهى ( اللي أغلبهم لاعبين معتزلين و لا يعرفوا يعني إعلام و لا مسئولية الإعلام) و الصحف الربحية اللي بتهدف أنها تحقق أعلى نسبة أرباح و لو على أشلاء العالم ....





19 من حقك تقول لكن مش من حقك تجور:

haninalnada said...

الموضوع جميييييييييل بجد يا سكا
وصياغتك ليه دمها خفيف فى نفس الوقت كشفتى عن مهازل بتحصل
وياريت ما تنسيش تنزلى موضوع قناة الجزيرة مع اخواتها الحلوين اللى فوق
ربنا يوفقك دايما

esraa said...

ميرسي اوي انك اشتركتي في المبادره
:)

جبهة التهييس الشعبية said...

تم اضافة هذا البوست الى البوست المجمع للمبادرة
واي حد يكتب بوست بخصوص المبادرة دي ياريت يسيب اللنك بتاعه في تعليق هنا
http://www.tahyyes.org/2009/11/blog-post_3080.html

صوت من مصر said...

سيبك انتى
المصرى مصرى برضه

اقصوصه said...

فعلا معاك حق

Israa El-sakka said...

haninalnada
حشوف الفيديو اللي انتي قلتي عليه يا حنون لقيته فضايحي ححطه إن شاء الله :)

Israa El-sakka said...

esraa

على إيه بس ..ده أقل واجب بدل العته اللي إحنا شايفينه ده

Israa El-sakka said...

جبهة التهييس الشعبية

شكراً يا نوارة و ياريت يا جماعة كلنا نبعت أي بوست يصب في المبادرة لنوارة على اللينك ده
يصب في المبادرة في التعليق هنا عند نوارة

http://www.tahyyes.org/2009/11/blog-post_3080.html

Israa El-sakka said...

صوت من مصر

يعني إيه المصري مصري برده ؟؟

Israa El-sakka said...

أقصوصة
طب ما تشاركينا طالما مقتنعة بالفكرة

بدراوى said...

معاكى فى المبادرة و ان كنت مازلت معترض على بانر مبادرة الاخ الجزائرى الذى اشارت له نوارة فى بوستها
ليه بقى ؟

لأنه اختصر المبادرة دينياًً فى اننا مسلمون و قال اخوة مسلمون و ده غلط لأن الموضوع وطنى دينى و لا ينبغى حصره فى الإسلام فقط و لاايه رأيك؟

Israa El-sakka said...

معاك تماماً حتى نوارة كاتبة مكسوفة أحطه :)) لأنه حصر الموضوع في خانة الديانة و الموضوع ملوش علاقة بالدين من أصله :) يعني في أسباب تانية كتير توحد الشعبين دعوته دي معناها أننا بندعو المسلمين و طظ في الباقي معاك تماما يا بدراوي أنا كمان معترضة على البانر عشان كده محطتوش :))

micheal said...

تمتت الموافقة على جميع الطلبات يا إسراء وبرجاء ضروروة إضافة خالد الغندور ومصطفى عبده على دريم للقائمة المذكورة للدور القذر اللي قام به الثنائي في هذه الفتنة
بقالي 20 سنة بتفرج على كورة عمري ما كرهتها قد دلوقتي علما بأن المشكلة مش في الكورة قد ما في عقول الزبالة اللي عاملين فيها إعلاميين وللأسف هما بيحركوا شوية رعاع من الشعبين ينقادوا خلف عواطفهم تاريكن عقولهم في الغيبوبة
تحياتي

حلم بيعافر said...

والله مش دول بس
كل اللى فى الاعلام الرياضى فى البلدين مسئول عن الازمة اللى حصلت دى

م/ الحسيني لزومي said...

الاعلام اعلام النظام ونظامي مبارك وبوتفليقه هما المسؤلان في محاوله لإلهاء الشعبين عن الازمات الطاحنه ولله الامر من قبل ومن بعد
------

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك

فتاه من الصعيد said...

احيكي

مبدعه كالعاده

تحياتي

Israa El-sakka said...

micheal
ده أنا مش بطيق خالد زفت ده خالص ده عيط على الهواء مباشرة ..متزلف و مصطفى عبده أهو بيتحقق معاه أبقى قولي الأب دايتس

Israa El-sakka said...

حلم بيعافر

بأيدك تماما

الحسيني لزومي
صج بس فين دورنا ؟؟ سايبنهم يودونا و يجبونا ..إحنا ميتين يعني ؟؟

Israa El-sakka said...

فتاة من الصعيد
ربنا يخليكي بقى أنا أعزل من الورد بريس و أرجع البلوجور تقومي أنتي معزلة كده يصح :)))

Post a Comment

جبلكوا كوباية شاي في الخمسينة كده عشان تركزوا
مش حنبقى محابيس و مساطيل

و ما ينطق من قول إلا لديه رقيب عتيد

دي قيم ربانية يا ريت نحافظ عليها