Tuesday, 1 September 2009

حيث يصبح النمل أس البلاوي


لا أدري لما يطن و يزن هذا السؤال على رأسي تحديداً !! . ربما بسبب السهر الطويل و العطش المميت و الجوع الكثير ..بعودة دي أيام يا صائمين !! . لكن بجد لماذا تقشعر بدون العرب ( حكاماً و كثيراً من المحكومين ) حين تُذكر إيران !! . فتجد من يقول ساسانية ، و آخر يقول أعداء العرب و ثاني يقول عنصريين و ثالث يقول شيعة و رابع يقول صفويين !! . و تردد كلامهم بغبغائياً .. دون أن تفهم ما هي الساسانية و هل هي شيء قليل الأدب يستوجب التبرؤ ؟؟ و هل الصفويين إخوان المصفدين ( أي الشياطين ) .. خاصة إنك تفتح التلفزيون لتجد الشيخ من هؤلاء ..منتفض العروق .. أحمر كالأوطة المهدرنة ، يزعرق و يصرخ كأنه ينادي في سرفيس الميكروباص و يحذر من المؤامرة الساسانية ، الصفوية التي تستهدف تخريب الثقافة الإسلامية . و هو ما قد يجعلك ( خاصة إذا كنت مرهف الحس ، رقيق المشاعر ) أن تؤمن على كلام الشيخ ، خوفاً من وقوعه مفرفراً !! . و أخذت أفتش في ذاكرتي و أهرش في نفوخي ، عن أي سبب محتمل لهذه الكراهية . فأبو نواس من أصول فارسية و الحلاج كذلك و غالبية السادة المتصوفة .. و كثير من الكتب و العلم العربي القديمين منقول عن العلم الفارسي و في المدرسة درسونا أن العرب المسلمون ، قاموا بترجمة العلوم المختلفة عن الفارسية ، الهندية و العبرية !! ...و كثير من علماء العصر الإسلامي من أصول فارسية ...آه و صحيح لماذا هو هلال شيعي ؟؟ لما لا يكون نجمة سداسية مثلاً ؟؟ و هل يوجد مربع سني أو دائرة مفلطحة صوفية على سبيل مثال ؟؟. أعذرني عزيزي القارىء .. أستميحك عذراً فهذه تخاريف صيامي .لكن لا أذكر ( كما تخبرني ذاكرتي الصدئة ) أن الله يبشبش الطوية اللي تحت راسهم علماء الرسم الهندسي قد أخبرونا أن الهلال كشكل هندسي هو شرير بطبعه مثلاً ... حاشاه بل به نعرف غرة رمضان و شعبان و محرم و باقي شهور التقويم العربي القمري !! كما أن أسم جد العبدة لله – الله يرحمه – (هلال ) لذا فأنا لا أقبل المس بالهلال أبدا أبداً . خاصة أنني و في زيارتي الأخيرة لمتحف الفن الإسلامي بقطر لاحظت شيء عجيب ، غريب ... تشيب له رؤوس أصحاب نظرية( الهلال الشيعي ) فخير اللهم أجعله خير ، رأيت فيما يرى النائم أن المتحف كله مليء بالمعروضات الإيرانية بل لا أبالغ حين أقول أن أكثر من نصف المعروضات ( الإسلامية ) هي إيرانية .. في حين أنني لم أجد لدولهم - و لا مؤاخذة- أصرية زرع !! . و هو ما قد يدفعك عزيزي القارىء أن تتصور أن العرب الغيورون المغوارون قد قاموا بحملة بحرية رهيبة ( على شاكلة فيلم 48 ساعة في تل أبيب ) و قاموا بسرقة إيران و إسترداد التحف الإسلامية لأنها خسارة في الساسانيين !!( دايمن بيكلمونا بالنحوي معلش ) . طب يمكن تكون المشكلة في أسم إيران ؟؟ و لا أقولك دعنا من الأسماء المستحدثة ..خلينا في القديم ..فــــــرس .. هل مثلاً كلمة فرس فيها إيحائات كده و كده ؟؟ .

يعني فرس يشتيق منها فارس .. و هو ما يجعله مغواراً طماعاً إستعمارياً إمبريالياً خطراً على العرب المساكيين القنوعيين ؟؟ . أم يا ترى يشتق منها مفروس و هو ما يجعله ( منفسن ) مليئاً بالعقد و الكلاكيع النفسية و يبصلك في لقمتك !! . أم لأن في بلاد الفرس الأغيار ، توجد إنتخابات في حين أننا نعيش عصر الجمهلكيات ( فخر الفكر العربي : الجمهلكية ، أي الجمهورية الملكية ) .. أم لأن الأقليات العرقية عندهم ، قد تأخذ تصل أعلى المناصب في الدولة في حين أن الأقليات ( و الأكثريات و حياتك ) يختم على قفاها ؟؟ ، أم لأنهم لا يعرفون قوانيين الطوارىء و الإرهاب ( المعمول بها في كل الدول العربية تقريبا ) و هو ما قد يفتح عين الشعب على حاجات مش و لا بد ؟؟ ... حشاهم حشاهم الحكام العرب الحكماء الحنكاء ، الملزوقيين بغرة في الكراسي !! . أخذت أفتش في الذاكرة و أهرش في النافوخ ..ما السبب الذي إذا عُرف زاد العجب .. فلأن حكامنا مننا و من بيننا ..فعلى الأغلب قد أمضوا طفولتهم في اللعبة بين أزقة الشوراع و في الحواري و الحوانيت و لا بد أن في طفولتهم ( النجيبة طبعاُ ) قد أغارت بعض من هذه الأسراب ، المارقة ..فألهبت جلودهم و أدمت وجوههم و فتحت أعينهم مبكراً على المؤامرة الدنيئة و كرهتهم في إيران و اللي جي من ريحتها .... تفتكروا هو إيه ...... النـــــــــمل الفارسي ...فهذا هو السبب ...إن بعض الظن إثم يا أخونا !! .



________________________________________________


العميد مايكل طالبني بالجديد و الجديد اهو آخر تخاريف صيام


رمضان كريم يا جماعة

22 من حقك تقول لكن مش من حقك تجور:

بدراوى said...

جميل البوست ده
هههههههههههههههه
بس ايران مش ديمقراطية اوووووى
يعنى
صحيح افضل شوية من الهبل اللى عندنا
بس برده فيها دكتاتورية
شوية
---
تحياتى
و رمضان كريم
----
هو ايه علاقة مايكل
بالجديد
مش فاهم حاجة
:-)

قلم رصاص said...

السلام عليكم ورحمة الله وبركاته

ازيك يابشمهندسه

رمضان كريم وكل سنة وانتي طيبة

اولا لازم نفرق بين ايران الدولة النظام وبين ايران الشيعية

كلاهما مـُر بكل أسف

فايران النظام والدولة ..لها اطماعها في المنطقة مثل اسرائيل تماما وخصوصا اطماعها في السيطرة على المحيط العربي .. وتقدري تتأكدي من قراءة عميقة في الدراسات الاستراتيجية

دي نبذه سريعه

اما ايران الشيعية فحدثي ولا حرج

فالشيعة بالفعل خطر داهم على الاسلام الذي من المفترض هم ينتمون له الان

دعك من الماضي وخلينا في الحاضر..فهم في تاريخهم الحديث على الاقل يحرفون ويشوهون الاسلام بل يصل الامر بهم الى حد وصف حاله مع الاسلام كمن يتعمد هدم الدين

فهم على فرق مختلفه .. هناك منهم فرق وطسية عندما تتحاور مع اهل سنة النبي عليه الصلاة والسلام تجديهم قريبين ويفهموا القصص الملفقه عندهم من أئمتهم وافتراءاتهم على الاسلام

ومنهم فرق متشددة وخطيره يخرفون تخريفا عظيما لا يصدقه عقل

حاولي تقرأي لهم ..بس اهم حاجة من مصادرهم الاصلية التي يحاولون اخفائها عننا حتى لانكتشف حقيقتهم..انا عارف انك هتلاقي صعوبة في الوصول لهذه المراجع ..انا شخصيا بحثت كتير وعجزت..ولكني الان على اقل اخذ معلوماتي عنهم من علماء اجلاء كلنا ثقة فيهم..فهم حملة مشاعل الدين ويدعون لله بالموعظة الحسنة

وربنا يهدي جميييييييييع المسلمين ويوحد صفوفهم يارب

في حفظ الله

وجزاكم الله خيرا

micheal said...

ههههههههههههههههه..أيوه هو النمل الفارسي السبب..حد له شوق في حاجة
:)
بصي يا إسراء..هي إيران طبعا ليها مصالحها في المنطقة وبتحاول تحقق بعض المكاسب ليها بس طبعا أنا معاكي أن فيه تهويل من الإعلام العربي بشكل واضح أوي في اي حاجة تتعلق بإيران رغم تحفظاتي علي إيران في بعض النقاط
شكرا ع التسييح اللي في الاخر
ده
تحياتي

فتاه من الصعيد said...

ماشاء الله يا اسراء بوستاتك من جيد لاجود0000 وبصراحه دماغك عجباني

بس على فكره النمل الفارسي موش السبب 0000 الصرصار الامريكاني هو السبب :D

Nabil said...

السلام عليكم...
رمضان كريم...

بوست حلو جدا ويفتح باب مناقشه احلى.

معاكى ان فى ناس كتييير اوى بتردد فكرة المؤامره بجهل وعمال على بطال

بس بالنسبه للسؤال.. ليه الناس بتربط الفارسيه والساسانيه بالمؤامره؟؟

لان للاسف التاريخ بيقول كده الفارسيه مرتبطه بالشعوبيه ومرتبطه بتفصيل دين يجعل الفرس هم الاعلى كعبا وده اللى حصل زمان من البدايه خالص وحتى هتلاقى ان لو جه امام شيعى فى تاريخ الشيعه اتكلم كلام معقول تبرؤا هم منه_الفرس من الشيعه_ مهما كان كبير وذو مكانه عندهم. وده حصل كتير وده دليل اكيد على ان الهدف من ده المغالاه فى الانتماء لشعب معين فقط وليش لمصلحة الاسلام كامه واحده وهى فكره اساسيه فى الاسلام وهى فكرة الامه.

اعتقد مفيش مجال لاثبات الجذور التاريخيه للازمه

بس فعلا المشكله تاريخيه

اما نظرية المؤامره الحديثه ففيهااسم الفرس مرتبط بالشيعه حاليا لان الدوله الى تعتمد النظام الدينى الشيعى رسميا للدوله هى ايران الفارسيه والتى لم ولن نتمى للاسلام بقدر ما انتمت للفرس والقوميه الفارسيه هى الاساس ليس كمصر مثلا.

وحيث وجد الشيعه وجدت النزعات الانفصاليه المسلحه التى تستبيح دماء المسلمين من السنه على وجه الخصوص

مثلا زى الموجود حاليا فى اليمن والموجود فى العراق وفى لبنان .مع ان الاخيره لها وضعها الخاص الا انه بشكل او باخر وضع خاطىء.

وبعدين النظام الايرانى كنظام سياسى مش ديمقراطى للدرجه المبهره يعنى

شوفى الباسيج مثلا...واخوات الباسيج..
هتلاقى القمع ولكن باختلاف الصور والمسميات..

وشوفى مثلا كمان شروط ترشيح شخص للرئاسه

يعنى مش ديمقراطيه شبه كامله حتى

واما من الناحيه العقائديه ففى طعن فى ثوابت الدين التى لا تحتمل النقاش زى مثلا تحريف القران وتناسخ اروح الائمه ال 12

وده موجود فى كتب الامه الاعلام منهم


عشان كده الازمه بقت تاريخيه بين السنه و المغالين من الشيعه وارتباطهم الوثيق بالفرس.

اما النمل الفارسى برىء تماما من الموضوع ده

mido said...

للأسف كذا معلق على البوست استشهد بمرويات شيوخ السلفية

و ده أمر غير معقول بأى حال و مش علمى

رئيس التحرير said...

بسم الله الرحمن الرحيم
السلام عليكم ورحمه الله وبركاته
اسجل اعجابي بالموضوع والاسلوب الشيق المعروض به
وبموضوعيه تامه ليست ايران الدوله الشيعيه او الفارسيه او النظام الحالي هي النموذج الذي يقتدي به.
فهي لا تبحث الا عن مصالح ايران وايران فقط.
فليس من العقل ان نثق في أنسان او دوله لا تري إلا نفسها.
مع كل التقدير و الاحترام لما قلتم .

micheal said...

الحلقة ال29 نزلت
:)

الغريـــــــب said...

طرح هادف ومتميز .... ارى ان جزء من المشكله يكمن فى الدعاية الغربيه والهجوم على ايران ومحاوله بث التفرقه كذريعه للتدخل العسكرى فى البلاد الاسلاميه

..... متابع لجديدك المتميز ان شاء الله ...ودى واحترامي

micheal said...

ايه الأنتخة دي
:)

Tarkieb said...

عمرك تعاملتي مع اي حد ايراني؟ انا ما كنتش اعرف الا شاة ايران والاتوبيس المرسيدس اللي جه هدية منه للسادات وكان اسمه الاتوبيس الايراني وبصراحة كنت مش باطيقه لانه بيفكرني بالزحمة والعرق وريحة الحلبة وخناقات الستات مع الرجالة والنشاليين .....ولما خرجت برة مصر واكتشفت ان الايرانيين لسة عايشيين في الماضي وكرهم للعرب انهم ضيعو حضارتهم المزعومة ....ومدي تمسكهم ان الخليج العربي اسمه الفارسي ....وامدي كرهم لعمر ابن الخطاب وتصويره على انه شاذ جنسيا وحتى ابو لؤلؤة اللي قتله بقى سيدنا ...بصراحة كرهت اي حاجة ايرانية وغرورهم الاونطة بتوع الحضارة ....وبصراحة كرهتم زي اتوبيسهم واكتر

الازهرى said...

أنا والدى حكى لى عن واحد زميله شيعى كان بيدرس معاه فى مصر وكان اول ما يسمع الله أكبر فى الأذان
يقوم على المسجد مباشرة حتى لو كان فى نص الأكل
تفتكرى بقى عندنا كام واحد من السنه المصريين بيعمل كده

لا والأدهى انى سمعت واحد بيكفرهم تماما مع ان لهم مذاهب فقهيه معترف بيها مناالمجمع الاسلامى

ربنا يهدى

بدراوى said...

عيد فطر مبارك يا اسراء
:-)

micheal said...

عيد سعيد وكل سنة وأنتي طيبة يا فندم

mimi said...

ميمي جابت العيدية ... عيد سعيد

http://2.bp.blogspot.com/_wyjXbHak4DY/SOH3035f_ZI/AAAAAAAAAWI/vXOd49itD38/s400/untitled.bmp

فتاه من الصعيد said...
This comment has been removed by the author.
فتاه من الصعيد said...

كل سنه وانت طيبه يا اسراء ... انت وكل الاسره بخير

THE illusionist said...

كل سنه وانتى طيبه يا روءه
وكل الاسره بخير
عيد سعيد يا تنت

صفــــــاء said...

شوفى يا بنتى
صلى على النبى
اولا انت دماغك حلوة بجد
ونضيفه جدا
وافكارك مرتبه
وبتعرفى تعبرى عنها صح
ثانيا الموضوع دة بالذات زهقت من كتر النقاش فيه مع الناس وبحاول اقول راى مشابهه لرأيك كدة واننا نشوف فيهم حاجات كتير كويسه
لكن محدش عاوز يشوف غير الشيعه الرافضه الكفرة
ربنا يهدى

كل سنه وانت طيبه يا قمرة وتنعاد عليكى الايام بكل خير

ميمي وأحمد said...

اللي عيد ميلاده في شهر سبتمبر يقول :
أناااااااااااااااااا

أو يعرف حد مننا عيد ميلاده في سبتمبر


ويكتب يوم كام في شهر سبتمبر




هنا حفلة كبيرة جدااااااااااااااا

اقصوصه said...

كل عام وانتم بخير

الرخمة said...

قرار 101
بعد المشاورات و المؤتمرات و المناقشات
قررنا نحن رخم باشا و رخمه هانم
انشاء بلوج نرخم بيه عليكم
و من باب التكرم و التفضل و الرخامه
حبينا نقول لكم عشان تيجوا تزوروا البلوج غصباً عنكم

و مش هقول سلاااام
رخامه بقى هه

قهوة الرخمين
:D

Post a Comment

جبلكوا كوباية شاي في الخمسينة كده عشان تركزوا
مش حنبقى محابيس و مساطيل

و ما ينطق من قول إلا لديه رقيب عتيد

دي قيم ربانية يا ريت نحافظ عليها