Tuesday 30 June 2009

سموم و زيتون


بث فيه سمومك

و أزرع شجر الزيتون

أحبسني جوه جحورك

و فتني لحد ما ابور

و أطلق عليه همومك

سب و قهر

و سجون

تجلدني فيها ليلاتي

بسوطك الملعون

طلع خوفك عليه

رصاص مدشوش

و صوب عليه مدافعك

تنقد بتهكم مكروه

و فاكر نفسك كده

أبو ديل مبروم

حامي حمى أهله

من كل مكروه

و لما أقع بهــواني

تصرخ كالمجنون

و تحفى بين القرى

الأضرحة

والنجوع

تطلب ليا الشفا

لكن عز المطلوب

القلب مهواش خزف

يدوم بعد كسور

أردم عليه ترابك

و أنساني

حي موجود

وأقفل عليه تابوتي

أنا أمسيت مقبور

ليك حبايب غيري

تزود عنهم لدهور

لكن باللهِ أستحلفك

بلاش تبث سموم!!

بث فيه سمومك

و أزرع شجر الزيتون

و خدني بين أحضانك

لمرة قبل ما اموت

و أعمل من دموعي

أكليل ورد و زهور

تحطه فوق مقام

كل من ظلم له

محبــوب



******************************

أقولوا رأيكوا بصراحة من غير كسوف سواء حلو أو وحش !! خليك ناقد ثاقب زي شبير :) و وعد مني حتحلى بالروح الرياضية اللي بيمثلها جمهور الإسماعيلي في متشات الأهلي :)


22 من حقك تقول لكن مش من حقك تجور:

Unknown said...

جميل اوووى الكلام
يا اسراء

طبعاً الكلام بتاع الكورة ده مالوش علاقة بالكلام اللى فوق
صح
‍‍!!!

Israa El-sakka said...

هههه لا مالوش علاقة طبعاً بس جه على بالي كده عشان كنت بتفرج على محلل غريب في التلفزيون :) شكله بياع بطيخ أساسا
سلااام

mohamed ghalia said...

ده ايه تقبل النقد العالى ده ههههههههههههه
بجد البوست هايل وكلماتك رائعة
تسلم ايدك وبالتوفيق دايما

mido said...

انا حقوم اعمل كوباية الشاى

حلوة اوى يا اسراء
:)

Ramy Wasel said...

حلو الاسلوب
بس صعب جدا
وانفعالى جدا
ليه القسوه دى كلها
اكيد من الفرجه على شوبير

The illusionist said...

يعنى بعد الكلام بتاع شوبير اللى قولتى عليه
لو اتكلمت بحق ربنا نقول
اسلوبك جميل وشعرك ظريف
بس مليان ضرب وولعه وسم وحزن
بس ميضرش
لكن لو هتكلم على لسان شوبير
اقولك انك
هه
ييجى منك كمان تمنتاشر سنه
بعد ما السيول تنزل
عشان البوران اللى انتى كاتبه عنه
مساء الفل صحيح
بنصبح وبنقول
الغيبه كانت طويييييييييييييييله

Kalimalhus said...

الفكرة و الإحساس 10/10
ده طبعا المهم أيا كان نوع الكتابة اللى تقصديها سواء كانت خواطر منثورة أو محاولة شعرية..
لكن لو هدفك هو كتابة شعر بالعامية يبقى لازم تراجعى إختيارك للمفردات .. مفيش مشكلة طبعا إن لما تحتاجى تمزجى مفردات من الفصحى بالعكس فى مكانها بيكون ليها أثر رائع و عليكى إنك تراجعى إختيارك للمفردات الفصيحة و مكانها و معدلها..

الشعر موسيقى و دى الحاجة التانية اللى محتاجة تراجعيها مثلا:
بث فيه همومك
و إزرع شجر الزيتون
أو
و إزرع شجرة زيتون

إحتمال كانت تبقى أفضل لتحقيق نعومة أو إنسيابية موسيقية..

موهبتك حقيقية .. إشتغلى عليها..

ادم المصرى said...

بوست جميل جدا وكلمات اجمل وشديد مووووووووووووت

محمد مرعى said...

جميل قوى البوسط دة اكيد تعبير عن معانى كتيرة جواكى وجوانا ,,مش شرطى تهتمى بالقافية ولا انك تكتبى شعر بالعامية .. المهم تطلعى ان جواكى زى ما هو

الشعب لابد له من حكومه تشكمه said...

ايه يابنتى انتى بتنزلى البوست فى مناسبات قوميه؟؟؟انتى فينك بنقلق عليكى:)
واحييكى على روحك الرياضيه مش بعيد الواحد بعد ميقول رايه يلاقى صواريخ ومولوتوف اتحدف عليه.
لا بجد الكلام حلو جداااااااااااااااااااااا ,روستوك كده اهدى يعنى:)

جحا المصرى said...

وإذا لم يكن هناك داعى للنقد فلماذا النقد
عودة من الزمن القديم

من غير عنـــوان said...

كتبت بقوه
ما شاء الله

الميكروباص said...

حلو اوي اوي ما شاء الله

صوت من مصر said...

مبفهمش فى الشعر عموما
بس هى تحفه بالنسبه ليا

Sweet Violet said...

كفارة ياماما انتى كنتى فين ؟؟؟
ولا هو انتى زى القمر مش بيظهر الا ايام معدودة فى الشهر
^_*

لا بس حلو يا آسو بجد
^_^

Anonymous said...

الفكره جميله يا اسراء ....... والكلام حلو جدا
كملي تجاربك وان شاء الله في تقدم

micheal said...

استمري وبإذن الله في تطور مستمر
أوعي الطوب بقي
:))

محمد عبدالرحمن شحاته said...

سلمت يمناكِ على ماخطتها من أحرف لكي كل التقدير والى الامام دائماً ... دمتي مبدعه

انترنتاوي said...

حلو جدا يا إسراء

إستمري

حائر في دنيا الله said...

على كدا الواحد يتفرج على شوبير كتير ويغير جلده من الزمالك للاسماعيلي (ولا محصله بعضها)عشان نكتب حاجات في الجون كدا
بجد لديك أفكار جميلة ربما بتركيز أكثر سنسمع قريبا عنك في الشعر مع إسراء

لك تحياتي
السلام عليكم

mahasen saber said...

عايزه النقد الهادف الحر

بجدجميله جدا يا ساره والاجمل فيها شجرة الزتون
بكل ما يربطنا بالشجره دى من ذكرى لفلسطين ووجع وحلم مرير

هايله جدا يا جميله

ومعلش اتاخرت شويه فى زيارتك
معلش المواصلات بئه

ذو النون المصري said...

علي اعتبار انها محاولات لنظم الشعر تعتبر جيده
لكن هي للان ليست شعر كشعر الشعراء
محتاجه مزيد من القراءه الدؤبه و التركيز الشديد في مواطن جمال الشعر و الخيال فيه
تحياتي

Post a Comment

جبلكوا كوباية شاي في الخمسينة كده عشان تركزوا
مش حنبقى محابيس و مساطيل

و ما ينطق من قول إلا لديه رقيب عتيد

دي قيم ربانية يا ريت نحافظ عليها