Thursday 25 February 2010

أحمد مصطفى و فنون !! و قمل الدولة

أنا مضايفة فعلاً ...بجد الله يخربيتهم ضيعوا الدماغ الجميلة اللي كنت عملاها النهاردة
و أنا راكبة العربية تحت المطر
و بسمع فيروز ..
بصوتها الماسي الذي يعزف على أوتار قلبي
...ضيعوا حماسي بعد ما أسماء إبراهيم الطالبة بجامعة حلوان خدت براءة من تهمة سب و قذف الدكتورة ماجدة جمعة


عرفت خبرين أسوأ من بعض ..
الاول أن المدونة العزيرة جداً على قلبي
فنون أتفصلت من شغلها عشان نوت على الفيس بوك ...

أيوة و الله تدوينة حضرتك قريت الكلام صح

و تعود الواقعة الفيسبوكية لما البنت فنون قررت و أتهبلت في مخها و قررت تكتب تدوينة عن البرادعي ..و حطيتها كنوت على الفيس بوك ..
و أتهرشت في نافوخها و عملتها شير مع أصدقاء الأصدقاء ..و بسلامته رئيسها كان من بين أصدقاء الأصدقاء دول
فوصل للتدوينة ..و قرر أنه يفصلها
الغريبة أن الراجل مش مجنون لكن عنصري و متطرف ديني و متخلف
آه و الله تلاتة في واحد
1-
مبيشغلش مسيحيين...آه و كل واحد يقلب البطاقة على خانة الديانة
2-
مبيشغلش تخان ....يعني الكلابيز اللي زي حلاتي لازم يستعدوا عشان يتوزنوا قبل ما يقدموا على وظيفة
و أدى موظف إنذار عشان تخين ...
3- فصل موظفة بتشتغل عنده عشان كتبت نوت على الفيس بوك و نشرتها في مدونة !!


و تقريبا هو ده السطر اللي عفرته أوي في تدوينة فنون :

البرادعي لمبه ! وإحنا داويتنا مسدودة بقالها 30 سنة ..والكهربا مش واصلة أصلا




نصيحــــــــــــــــــة لوجه عوكل : أمشي جنب الحيط و خليك يا أبو زيد ما غزيت



القصة السودة التانية
هي أختطاف
المدون أحمد مصطفى و هو مدون عنده عشرين سنة من كفر الشبيخ و طالب بكلية الهندسة ..
أحمد أتخطف من موقف كفر الشيخ ..و ده بعد ما أستدعى بعد بوست نشره عن فصل تعسفي بحق طالب في الكلية الحربية
الغربية أن البوست ده منشور بقاله سنة بتاريخ 15 فبراير 2009
لكن في تعليق منشور بعديها بسنة ( 2010) من قبل شخص أسم تامر و فيه تهديد لأحمد

اضيف في 26 يناير, 2010 11:44 م , من قبل تامر
من مصر

قسما بالله انت ماتعرف حاجة
وكلامك على الفاضى وانت اصلا ملكش لزمة علشان مافيش حد بيظلم حد وبالذات فالكلية دى وانت لو راجل استنى يومين بس وحتشوف اللى يحصلك
انا عملت برنت للصفحة وحوريك الكلية دى حتعمل فيك
انا حوصله ان شاء الله للكلية





و أهله تلقوا مكالمة من
محامي مجهول قالهم أن أبنهم في النيابة العسكرية و أتحقق معاه
بدعوى الإساءة للجيش و زي ما اتبلغ أهله ..ـحيتم تحويله لمحاكمة عسكرية!!
شاب عنده عشرين سنة ..حيحولوه محاكمة عسكرية !!!
طب هما بيحولوا الجواسيس الإسرائيليين للمحاكمات العسكرية !!
أعتقد شعار المرحلة القادمة لازم يبقى :
أرجوكوا عملونا زي ما بتعملوا مع إسرائيل

اللي عايز يعرف تفاصيل أكتر ممكن يرجع لمدون محمد عادل " العميد ميت "

و عشان أزود من قرفكم ..لازم أؤكدلكم بما لا يدع مجال للشك
أن الشعب العربي أبو و أم و عيلة الأجنبي
خدوا ده


عوكل و شيوخ المنصر ...مش حتقدر ترف بعينيك

11 من حقك تقول لكن مش من حقك تجور:

مواطن مصري said...

أرفض اعتقال اي مدون بسبب رائية و لكني لا أصدق هذة القصة

مواطن مصري said...

متضامن مع فنون عشان واقعية و لها مصداقية عن الثانية

Unknown said...

والله انا قرفانه من اللي بيحصل ده بجد
هي البلد ايه اللي حصلها
هي مش الحربيه دي يعني الجيش
ومش المفروض ان جيش مصر كويس
امال ايه اللي بيحصل ده بس ياربي

أسمعنى شكراًً said...

أنا والله ماليش فى السياسة بس أللى شدنى أونكل تلاتة فى واحد وعموما من الوصف شكلة عبيط مدى على أهبل

Anonymous said...

ولسسسسسسسسسسسه

ده البرادعي لسه واصل

بس المدون اللي اتخطف ده غريبه شويه

تحياتي

Ramy Wasel said...

اهلا بيكى فى مصر يا اسراء
ده الطبيعى
ولو حصل غير كده الواحد يبدأ يشك ان فى حاجه مش مظبوطه
ولذلك ننادى بفتح سفاره لمصر داخل القاهره دفاعا عن حقوق المصريين المغتربين داخل مصر

Haytham Alsayes said...

حسبنا الله ونعم الوكيل
خلاص ياجدعان والله احنا جبنا اخرنا من الل بيحصل ده يارب علي الظالم والمفتري
عجبتني مدونتك جدا
وتقبلي مرورى وشرفيني بزيارتك

The illusionist said...

يا خبر اسود ومنيل بستين نيله

انا جاى اكتب رد قريت دى جنب ردى عدل

لا بد من يوم معلوم تترد فيه المظالم أبيض على كل مظلوم أسود على كل ظالم

هو اليوم ده امتى بقى؟

مصطفي حــسين said...

مدونة رائعة فعلا اسراء
موضوعاتك جميلة انتي كنتي تايهة فين اتمني زيارتك لمدونتي
www.mos.maktoobblog.com

micheal said...

محاكمة عسكرية وفصل عشان تدوينة..أنا ايه بس اللي رجعني لعالم المدونات تاني
:(
تحياتي يا إسراء

bastokka طهقانة said...

يعني اية اتخطف؟ تقصدي اتقبض عليه؟

و بعدين ليه فنون تترفد بسببمقال ايه علاقة الشغل بالمدونة؟
حاجات غريبة مش فاهماها

Post a Comment

جبلكوا كوباية شاي في الخمسينة كده عشان تركزوا
مش حنبقى محابيس و مساطيل

و ما ينطق من قول إلا لديه رقيب عتيد

دي قيم ربانية يا ريت نحافظ عليها